Ek Naav ki kahani

Hum baat kar rahey hain pyar ki, rishton ki.. jinke kai pehlu hote hein, aur jinse kai bhaav utpann hotey hain. Aise hi ek pehlu ko lekar humne ek kahani likhi hai aur uske andar chhipe bhaavon ko kareeb se dekhne ki koshish ki hai Chaliye, sunte hain

Ek naav aur uske naavik ka Rishta bhi kuch khas hi hota hai – kai saalon ka ek lamba saath, kai utaar chadhav aur kai badlav. Par kuch cheezein shayad kabhi nahi badalti. To baat us samay ki hai jab ek naujawan ne kai saal pita ke saath naav chalane ke baad apni khud ki naav lene ka faisla kiya. Ladka bada ho gaya tha aur pita bhi khush the. Pita ne ladke ko wahan ke sabse anokhe naav banane wale ke paas bheja. Naujawan naav banana wale se mila aur usne unse kaha – kaka ek pyari si naav bana do, ek aisi naav jo mujhe toofano se bhi bachaye aur mujhse shant samandar mein man ki baatein bhi karey. Naav banana wale ne uski aankhon mein khwab dekhe, aur ussey aisi hi ek naav bananne ka vaada kiya. Fir badey pyar se unhone ek naav banai – ladke ko bulaya – aur fir samandar ki devi ki pooja karvakar uski pran pratishtha karvai, aur usey pani me utaar diya.

Naav ki aankh khuli aur usne apne naavik ko dekha…. Ek umang si thi usme, dhoop se paka gehra rang aur Tarun sheer ki taakat. Man ka bhola aur khwabon se bhara ye naavik usey roz savere aakar niharta, tilak karta aur fir pani me utar jata.

Lehron se parey, gehre pani mein, apna jaal phenk wo apni naav se baatein karne lagta – apne man ki sabhi gaanthein wo apmi naav ke saath kholta tha… aur hamari naav usey sunti rehti. Wo inhi palon ko sanjoey roz uska saath deti thi – aur jab doobtey sooraj ke saath wo apne ghar jane ke liye utarta, tab wo apni naav ko choom kar, agle din milne ka vaada kar, gungunata hua nikal padta tha. Naav uski baton ko yaad kar poori raat guzar leti aur agli subah sooraj ki pehli kirano ke saath uske aaney ko aankhein bichaye rakhti. Uske dikhne bhar se chehek uthti wo naav.

Kabhi kabhi, toofano mein, naav uski ghabrahat kam karne ko, takatvar maujon se bhi bhid jaati aur chot khakar bhi, naavik ko pareshan nahi hone deti. Aur kuch shaamein aisi bhi thin ki naavik der shaam tak joojhta raha aur thak kar apni naav mein hi so gaya. Aise me naav ne dolte hue uski neend tootne na di, aur usko kinaarey tak le ayi – par usko jagne nahi diya. Is dauraan, har Poornima ki raat ko naavik apne ghar se ek thailey mein hathaudi kilein lakdi ke tukde lata aur apni naav ke chote mote ghaav – chote motey suraakh bhar diya karta tha. Ye dastan yu hi chalti rahi, kai barsaatein ayin aur chali gain. Fir ek din, ek admi motor boat lekar unke pani mein aya. Ab Nayi naveli Motor boat chamak rahi thi, aur tez rafter se pani mein daud rahi thi. Naavik use dekh mantra-mugdh ho gaya. Naav ne apne naavik ko motorboat ko niharte dekha.. aur uske dil mein uthti tarango ko padha. Use laga shayad ek naya utsaah saa tha naavik ke man mein. Uska utsah motorboat ke maalik se bhi chhupa nahi raha, motorboat ke maalik ne use agle din motorboat chalane ka nyota de diya. Naavik ne turant hami bhari aur uske chehre pe Khushi ki chamak thi… Us shaam, pani se utarte waqt usne naav se kaha – hum kal samandar mein nahi jayengey tum ek din aaram karna. Wo ek din, naav ke liye, ek umr jaisa guzra aur naav akele kinare pe naavik ki Muskaan dekhne ka intezaar karti rahi. Jab shaam ko ve samandar se laute to naavik ka ullhaas apaar tha, naav uska hasta hua mukhda dekh ke khil uthi. Jab vo kareeb aye to usne suna, naavik motorboat ke maalik se uski motorboat ka daam pooch raha tha. Yahan Naav abhi bhi uski muskurahat mein leen thi. Par motorboat ka daam sunkar naavik achanak chup pho gaya, uska chehra utar gaya. Us shaam naavik kuch chup sa hi raha,,, wo kaafi der baitha raha apni naav mein aur naav uska dard mehsoos kar rahi thi, par shayad seh nahi paa rahi thi.

Naavik ne naav ko dekha aur fir kahin door dekhta hua, khoi si ruasi aankhon se utar kar, – bina apni naav ko chumey… ghar chala gaya. Naav ne naavik ke dard ko samjha aur wo ye bhi samajh gai ki naavik uska jayza lekar gaya hai – uske bikne ka waqt aa gaya hai. Apne naavik ke liye bik jaane mein bhi usko ek sukoon ka abhaas hua, par jab usne khud pe gaur kiya to usne paya ke uska rang ab ud chuka tha… kai jagah lakdi ukhad gai thi, kuch surakh bhi they… aur gaddiyon, chapparon mein ched the. Kuch gehri andheri si thi wo raat, jo guzar hi nahi rahi thi…. Par achanak, Naav ko, naavik ke saath bbitaye wo purane din yaad aye… unke sambandh ke wo kuch
naye naye din, aur wo sabhi khoobsurat lamhe jo unhoney akele samandar ki lehron mein bitaye they. Kaash mein vaisi hi hoti ab tak, aur mujhe bechkar mere naavik ko dher sara paisa mil pata… aisa sochti wo us raat mein kho gai.

Us raat naav ke dil se ek Kavita nikli:

Tera Asmaan

Na baahon mein meri tera aasmaan ho
Na aankho mein meri tera Aashiyaan ho
Haath pakad ke to chalti hai duniya
Apni awaragi hi andaazey bayaan ho
Mauj nahi Tu samandar hai poora
Lehro se teri ginti kahan ho
Abhi to udaane bahut si hain bharni
Paron pe tere is hawa ki sada ho
Thaam sakein na tujhe Sarhadein bhi
Na bandish me koi tera karvaan ho
Duaein Meri saath tere aey yaara
Har Manzar tera sada khushnumaan ho
Mera ek katra tu rakh saath apne
Kahani mein teri Meri bhi dastaan ho
Mein bhi udunga kahin us Gagan mein
Jahan muskurati apni parchaiyaan ho

Us pyasi subah ki kuch pehli kirano mein usne naavik ko door se aatey dekha – uske haath mein lakdiyon ka ek thaila tha, niley aasman sa ek naya chappar aur hathaudi thi… Naav apne aansuon ko samandar ke pani mein milne se rok na pai…. Par shayad ab isme dard nahi tha.

Hum sabhi ne rishton ko bante dekha hoga aur shayad unhe badalte bhi… jo rishtey hamey kabhi sukh dete hain wahi kabhi kabhi dukh dene lagte hain – aisa kyun hota hai Kya hamara pyar badal jata hai Ya uski paribhasha Kya hamara pyar paristhiton ke parey hokar hamesha ek tarfa rehkar, hamein sukoon de sakta hai Aap mein se koi bhi ispe kuch kehna chahey ya apne Jeevan ki koi dastan hamse baantna chahe – to apka swagat hai….